الأربعاء، 23 فبراير 2011

رسالة من أرض حرة


إلى كل من يقول أن ماحدث خطأ (خوفا على المصلحة الشخصية).... لا



طين أرضى ندانى ... وهمس ليه فى ودانى
(قالت الأرض)
لاراح تروينى ميتك ... ولا راح أحضن بزرتك
ولا راح أطرح ثمرة ألا لما الحق يرجع
غير لما يتحاسب الظالمين على الملأ والمسمع

وراح أكسر سن فاسك ... لوماحاكمت إللى خانونى
وبالرخيص صدروا رزقى وباعونى

وأكلوك الحطاب ... وسفـفـوك التراب
وعروا لحمك للكلاب ... وسابوك من غير سند

ولما جت ساعة الحساب ... وقامو أخواتك بالإنقلاب
صرخت فيهم بالعتاب ... وطلبت من الله المدد

أزاى وربك أسمه الحق ... وأخواتك معاهم كلمة الحق
ومابينهم شهداء الحق ... ومنهم فى الميدان سجد

وأنت ماخفتش غير على مصلحتك ونسيت باقى أرضى
(رد وقال)
سامحينى ياأرضى كنت خايف على رزقى وعرضى

(ردت الأرض)
لكن أنا دلوقتى من دم ولادى أرتويت
وراح أترح ثمرة الخير وأعمر البيت
ورغم أنك على حق أخواتك أتعديت

هما يسامحوك أن هاسامـــح
وبأديكم ياأولادى ضد الفساد هانكافح

وسلامى ليك أنت وأخواتك
وبأيدك تغير للأحسن فى حياتك
-----------------------------

التوقيع: أرض مصر

___---___

تحياتى

هناك 3 تعليقات:

mrmr يقول...

رساله فى الصميم .. احسنت
تحياتى لقمك

غير معرف يقول...

أميره
رسالتك خرجت صوت ارضنا ووصلت ردنا ورد بلدنا على من يقول (أنا)

Unknown يقول...

الله عليك جميله اوي تسلم ايدك