الاثنين، 13 سبتمبر، 2010

بلاعة واحدة لاتكفى


أنا ساكن بمنطقة السيدة زينب يعنى (بلد القنبلة)

إمبارح نزلت عند قهوتنا
وقلت أقعد شوية وكان فى ماشاء الله بلاعة مسدودة ومبهدلة الدنيا
قولت أروح عند مبنى الحى أجيب السباك بتاع بلاعات الشارع
أللى متعود من وأنا صغير أجرى أناديلة كل لما بلاعة تضرب
وسبحان الله عمره ماسمع كلامى وجه يسلكها ألا لما (يقفش)
المهم كالعادة ماعبرش أمى ونفضلى قولت أروح لة تانى يمكن
يزهق منى ومن زنى ويجى يشوف الدنيا الغرقانة بمية المجارى
لاقيتة قاعد بيحشش هو وبعض الزملاء معاه ....
وفعلا فضلت أزن علية شوية لحد مازملائة هما أللى زهقوا
قام واحد قايلة: ياعم الصاوى قوم شوف الناس عايزة أية
ماتفصلناش
المهم أونكل الصاوى خد عجلتة والأسياخ أللى بيسلك بيها
وقالى أبقى حصلنى على هناك
أنا قولت الحمد لله خلص الموضوع ...
أول ماوصلت لاقيتة بيلم العدة وخد بعضة وكالعادة قفش المصلحة
وقام ماشى .... يادوب ولعت سيجارة
ولقيت البلاعة طفحت تانى ومعاها كمان البلاعة الأم أللى على ناصية الشارع
وبلاعة أخرى كمان كانت فى أخر الشارع من الناحية الأخرى...
أخدت بعضى ورحتلة فى ساعتها رد عليه وقال :وأنا مالى أنا سلكت
وماليش فية قولتلة ياعم الصاوى دة انت سلكت جيوبى مش البلاعة
قام قايلى بغضب :أمشى ياض روح على بيتك
وبدون نقاش أخدت بغضى وطيران على البيت
وأنا فى الطريق بفكر:ياترى عم الصاوى شرب مية المجارى علشان يعلى بيها الهد
ولا هو كان بيسلك فى حتة تانية ومش واخد بالة
قائلا: حتى البلعات طفحة منك ياحكومة

هناك 5 تعليقات:

ساسو يقول...

موضوع البلاعات دا مزهق الناس كلها
انت بقي شوفلك واحد غير عمنا المحشش دا
شوف واحد يكون مصحصح
مش عامل دماغ
وربنا يعينك

كل سنه وانت بخير

mrmr يقول...

هههههههه
عم الصاوى ده دمااااااااااغ
بالزمه اسأل عم الصاوى جايب الحشيش منين لحسن بيقولوا شحيح اليومين دول ومختفى
هههههههه

يا ابنى ابعد عن المحشش وغنيله وشوفلك حد غير عم الصاوى ده

والرب يعين ويساعد

كل لحظه وانت بخير

ساسو يقول...

ايه مشكله البلاعه خلاتك تنسي مدونتك واصحابك ولا اييييييييه

أسمعنى شكراًً يقول...

ساسو
_____

أنا موجود تحت النظر أهوة بس هما شوية شغل وعدوااا

أسمعنى شكراًً يقول...

mrmr
_____

فيه حشيش أللى عايز يقول وأنا أجيب من عم الصااااااوى....!

وأن أسعد