من حكاوى الشكمجية

أوصف موضوعى بالماضى القديم
دة أذا ماكنش الموضوع قديم أصلا

شكمجية فيها زحمة ورق
ورقة منهم فيها سر خطير
وبسببها قلوب كتير بتنحرق
لجل السر مايطلع ويعمل قلق
والشكمجية مرمية .. مرمية
مرمية فى بير غويط وخطير
مينقذهاش غير الأمير الفقير
يخطفها على حصانة ويطير
يوصل بيها لقمة المجد ونحس بالتغير
لأن أللى داء الظلم يرضى بغير
يرضى بالعدل يحققه ويحس بية
ثباتها وصمٌدها له معنى وألف دليل
مسير النهار يطلع بدل سواد الليل
الصبر طيب يابلد والشعب ياما أتحمل
كفاية الشباب على نيلك قاعد بيتأمل
بيتأمل شعاع النوريمكن فى الحياة يكمل
صبرة فى صنارة سمك
من الظلم ياما أتهلك
وعقول كتير نايمة . بالمخدرات قايمة
قايمة تدور على الاصطباحة
منين ياشعب مصر وأمتة هتلاقى راحة
وفيها أللى ماشى فى حاله
عايش وهو مالة ..
مش عايز حاجة منها خلينى جنب الحيط
مسير الحيطة تقع وهاتمشى فيها مكشوف
وتندم على أللى راح وأنت ماليك الخوف
دى ورقة بين الورق فى الشكمجية الغرقانة
بسببها ياما القلب أتحرق وحسينا بالإهانة

صنع فى ( الطين )

كلب صيد لئيم
مسعور وبيفنن
بلد الغلبان الحليم
وفى سنانة بيسنن
وهو لسة هايهبش
لسة فية حيل ينكش
دة خلاص منة بتفنش
وهو فى القصر بتاعة بيورنش
الجذمة البنى بنى * والجذمة السودة سودة
ورنيش الصين دة أنضف
بدل المصرى بيفنش
مصاريف ومكسب مافيش
يأما نستورد يأما نبيع حشيش
والشاى أهوا مرمى قدامة
على صينية مزخرفة
مزخرفة بعلمك يابلدى . أللى هو مش صنع مصرى
وبجنية ونص دا عرض حصرى
قوم ياصينى قوم لنصرى
-------------------------------
أللى بيحصل دلوقتى أية التجار عايزين يكسبوا..
فابدل مايصنعوا المنتج بتاعهم ويكلفهم ويكون مكسبة أقل.
يقوم التاجر من دول عامل أية قافل مصنعة وقالبة مخزن ..
ويستورد من الصين أرخص وأحسن من أمكانيات الصناعة فى بلدك
والمكسب .......! مضمون
وسى زفت الطين أللى سايبها سداح مداح
الله يخرب بيتة بوظ الصناعة أكتر ماهى بايظة

بلاعة واحدة لاتكفى

أنا ساكن بمنطقة السيدة زينب يعنى (بلد القنبلة)

إمبارح نزلت عند قهوتنا
وقلت أقعد شوية وكان فى ماشاء الله بلاعة مسدودة ومبهدلة الدنيا
قولت أروح عند مبنى الحى أجيب السباك بتاع بلاعات الشارع
أللى متعود من وأنا صغير أجرى أناديلة كل لما بلاعة تضرب
وسبحان الله عمره ماسمع كلامى وجه يسلكها ألا لما (يقفش)
المهم كالعادة ماعبرش أمى ونفضلى قولت أروح لة تانى يمكن
يزهق منى ومن زنى ويجى يشوف الدنيا الغرقانة بمية المجارى
لاقيتة قاعد بيحشش هو وبعض الزملاء معاه ....
وفعلا فضلت أزن علية شوية لحد مازملائة هما أللى زهقوا
قام واحد قايلة: ياعم الصاوى قوم شوف الناس عايزة أية
ماتفصلناش
المهم أونكل الصاوى خد عجلتة والأسياخ أللى بيسلك بيها
وقالى أبقى حصلنى على هناك
أنا قولت الحمد لله خلص الموضوع ...
أول ماوصلت لاقيتة بيلم العدة وخد بعضة وكالعادة قفش المصلحة
وقام ماشى .... يادوب ولعت سيجارة
ولقيت البلاعة طفحت تانى ومعاها كمان البلاعة الأم أللى على ناصية الشارع
وبلاعة أخرى كمان كانت فى أخر الشارع من الناحية الأخرى...
أخدت بعضى ورحتلة فى ساعتها رد عليه وقال :وأنا مالى أنا سلكت
وماليش فية قولتلة ياعم الصاوى دة انت سلكت جيوبى مش البلاعة
قام قايلى بغضب :أمشى ياض روح على بيتك
وبدون نقاش أخدت بغضى وطيران على البيت
وأنا فى الطريق بفكر:ياترى عم الصاوى شرب مية المجارى علشان يعلى بيها الهد
ولا هو كان بيسلك فى حتة تانية ومش واخد بالة
قائلا: حتى البلعات طفحة منك ياحكومة

أنا عاوز أتجوز بالمرة ....(خاص)

أنا فاتح قهوة والشعر بألفة وأنا بعمل الشاى وبكرس المعسل
وبحب منير وهانى وفؤاد وأصالة وأليسا وبحب حنان ماضى
وبحب الناس الرايقة أللى بتضحك على طول
أما العالم المتضايقة أنا لأ مانيش من دول

وبحب أقف فى طابور العيش بتاع الموزز

وبحب مسلسل هند صبرى (عايزة أتجوز)

وأنا مش بتاعة الكلام دة

أنا كنت طول عمرى جامدة

وأحلى مافى السفالة .. مقلب الزبالة

وكفاية كدة قوالة .. كدة أتحققت العدالة

.............................................
مع تحيات .. القهوجى

هيه هيه (العيد جه)

كل سنة وأنتم طيبين
ومن أبواب الرحمة قريبين
فرحنا فرحة العيد
والحكومة نازلة تبديد
والشعب فرحان أية الجديد
الحكومة أخرت ساعة قبل رمضان
ورجعت قدمت ساعة فى العيد
يعنى من الأخر الدين بعيد
قاعدين يلعبوا فى التوقيت ..وكأنه توقيت أبوهم
زهقنا من الأشكال دى ..نفسى تغيروهم
فى كونتينر فاضى وأشحنوهم
يروحوا أى بلد تانية.. ينزلوا على شعبها يبوظوهم
كفاية علينا الريس وأبنة.. دول هما أللى دربوهم!!

كابوس الفقراء

شارك معنا فى دعمه
زى رغيف العيش المحمص

__----_----__

من أجل سرقة مصر
ونهب خيرشعب مصر..!

صدق أللى قال (شر البلية مايضحك)

وأحنا شعب أعوذ بالله علينا مسخرة .. أكبر مشاكلنا بنحولها لهئ ومئ ودلع وشخليل

ودى بقى ياسيدى أحسن من قصة على بابا والأربعين حرامى

وأللى بقوا (واحد وأربعين حرامى)!!

ياترى ياشعب يابجح يالى واخد كل حقوقك ومش عاجبك..!!

يامواطن ياللى كرامتك فوق دماغ البهوات والبشوات ..!!

هاتقول أية المرادى برضة هاتنكت وضحك .. وبعد كدة تفوق على الكابوس الجديد

وتقعد تصوت من الخزوق الشديد..!

ولا تكنش فاكر أن تحت القبة شيخ لا دة تحت القبة ( شيخ منصر )

وعلى رأى أللى قال( أبن الوز عوام ) ولو كان هو حلم الفقرا أو كبوسهم

كان عملها أبوة وحقق أمانى وأحلام الشعب الغلبان أللى واخد على عينة وعلى كل حتة

وقلهالى صاحبى زمان :.... لو النيل كلة أتحول صلصة مش هاتكفى الكوسة أللى فى البلد

ودى أهداء منى لجيمى وأبوة

---________________________---

جيمى ياروش يامدلعنا

بالكلام الحلو نيمنا وسمعنا

سمعنا أسطوانة أبوك ومتعنا

حلم الفقرا دة حلم وجعنا

والبية فى القسم يعلقنا ويرفعنا

ومية النار شربنا وبلعنا

ظلم الحكومة والمر شربنا

دة كابوس وخلاص منة تعبنا

سواد فى قلوبنا وجلنا أكتأاب

من العيلة دى تانى ... لا كفاية عذاب

دة الشعب غلبان وبيصدق

كلكوا مفيش أصل ولا مبدأ

أهداء من واحد بيكره الريس وأللى يجى من نحيتة

نفسى ..أحس الأنسانية

ناعمة ولكن!!!!!!!

نفسى أفهم معناها

نفسى أحس بيها

نفسى أعمل بيها وليها

بيها وليها ومنها راح أامنها

أامنها من غدر الزمان

يالى مذكور فية بالباطل أنسان

نسيت أنا مين وموجود لية

وكأنى تايه فى صحرا ومش لاقية

لاقيتة ...

ولاغيرى لقاه كل دة لية

أتوة فى الصحرة وأضيع أنسان

أقع من طولى مرة وأتنين

وتتلم على جتتى الغربان

تقطع لحمى أللى باقى نساير

ويشرب دمى رملها العطشان

أرضها خاصمتنى

وميتها ماروتنى

كل دة علشان لغدرها نية

نفسى أحس الأنسانية

دة أللى مني محسش بية

يبقى أزاى تحس هية

من صغرى شايل مسؤلية

وحقى راح فى الأنسانية

العجلة من الشيطان

كان زمان قبل المسؤلية

أركب العجلة وأبدل بحنية

وأسمع أغنية السمسمية

ولما كبرت وشلت مسؤلية

بلدى سقتنى كوكتيل أحزان أشى أة على وجيعة وأتعذبت لهفة وشوق

خلتنى كبرت قبل الأوان شوفت فى جرح بلدى الفروق

ولماأسئل على العجلة كمان ينفضولى عافية وزوق

ويقولو العجلة من الشيطان طيب كويس أنى مابعرفش أسوق

ياسياية بلدنا ياعجلة دايرة

نسيتى الزراعة والأرض بايرة

ياسياسة بلدنا ياجنزير وترسة

مش مدية للصناعة فرصة

سياسة وأنا مش فاهمها

لوهى واحدة أنا راح أكلمها

يمكن أظبط معاها معاد

على خير بلدنا بليون سنة حداد

رمضان زماااااااااان

رمضانيات وأنتهت * والعباد بيه مش دريانة

وكل مسلم عليها سكت * والكل بيساعد بإيمانة

كل سنة وأنتم بخير حال

رمضان كريم عليه وعليكم

ولكن الدنيا بخيلة بخيلة أوى مديانى ضهرها وهرت قفاية ضرب

أنا تعبت من الأسلوب أللى أحنا عايشين بية حاسس أن الخير قل وقل بكتير

ربنا يتولانه برحمتة فين رمضان زمان فين البركة والخير ..

كنا زمان بنحس بالدفء وبالأمان.. دلوقتى مش حسين غير

بالخوف على أللى فى أدينا وياريت أللى فى أدينا شئ يتخاف علية

موهومين أن أحنا الحمد لله بخير ولكن الحقيقة غير كدة

برضة الحمد لله على كل شئ بس أحنا مضحوك علينه

والحكومة رسمه للشعب شكل غير الواقع

يختلف عن الواقع 180 درجة وبرضة المواطن بيقول الحمد لله على أنه عايش

طيب ماأنت هاتيجى بعد كدة مش هتلاقى نفسك أصلا

والأدلة على كلامى كتير.

وإلى كل من أراد الخير من الطبقة العليا. بطلب من الغنى القادر

ينزل شوارع الفقره وأسواقهم ويبص على حالتهم أللى هما فيها

لو عايزين يحسو أنهم عملوا حاجة فى رمضان( شهر الخير ) كما يقال

يساعدوا الناس أللى عايشة حياتها على الموئد الرمضانية

لأن الموائد الرمضانية سبب وجودها هو عابر السبيل أو فى لغة عصرنا

المغترب أللى مايعرفش حد فى المكان المتواجد فية

وفى النهاية دى فكرة وأنا واثق أنها مش جديدة وغيرى قالها كتير

بس أدينى بحاول ( وكم من حصى تبنى الجبال )

_-----------------------_

(وكل عام وأنتم بخير)

النشيد الوطنى (صراع فى الزبادى)

ياترى لو كانو عايشين كان دة هايبقى حال مصر

ديمقراطية وقالو أنتخبونا .. والشعب قال حادى بادى

صوتنا ليهم وماسمعونا .. والشعب كبر دماغة وعادى

باعوا الضمير ونسيونا .. وكل الشعب ساكت وراضى

طمعانين فى المعونه .. غير تسليك وسرقة الأراضى

داخل علينه رمضان .. الأب يقول أجيب منين ياولادى

____

يالى فـ كرش المسؤلين مهضومة يابلادى..

مهضومة فى وسط المشاكل ممدود عليكى الأيادى..

أيادى خاينة للأمانة كسرت قلبى وفؤادى..

وفـ نشيدك ياوطنى بقول لك حبى وفؤادى..

من صغرى بقدس نشيدك وبفـخر بأمان بلادى..

دلوقتى ملوش لزمة عندى دة بقى صراع فى الزبادى..

من غير عنوان (دى أفتكاسة شاب غلبان)

غنيت وقلت ياليل وكان النهار

نبحت حسى فى مواويل والقلب كان والع

قول مش فاهم كلامى أستفدت أية من أللى فاهمة

مواطن وبـبوح بألامى شاب وفاق من وهمة

مهما قولت فى كلام بلدنا مافيهاش سلام

من أول القسيس والإمام لحد الخمورجى والهجام

والزمن بيجرى بينا وخسرنا كل مالينا

وفقدنا أمانينا وخفة دمنا بتحينا

-----------------------------------------

هى دى بلدى وصفتها زى ماشفتها النهاردة وصباح الخير على الجميع

المنحوس مكتأب

واحد صاحبنا حياتة متشقلبة ودنيتة متدربكة واخد على دماغة من كل شكل ولون

بوزوة فقر و وشة نحس ... صبر كتير على الهم أللى هو فية . تعب كتير من عذاب

النفس ومش عارف يعمل أية .. فكر يغير حظة بأسلوب التعامل مع بقية المجتمع

قال مش مهم حقى فى بلدى الحمد لله أنى عايش فيها أصلا..

ومش مهم أهلى المهم أن لية قرايب أصلا..

ومش مهم الحب أدينى عايش كدة كدة ملحقش يعترف للى بيحبها بحبة

وأهى راحت لنصيبها أللى يصونها..

ومش مهم الصداقة كويس أنى ليه أللى بيسأل ..

____________________________

ولما أتكل على

*أن لية بلد عايش فيها أصلا بلدة هانتة وبالجذمة أديتة

*وأن لية قرايب...أول ناس باعتة

*والحب مش مهم لقى حياتة كأيبة وعلى حبيبة ندمتة

*ولما أتكل على أللى بيسأل زهقو منة وفى أول محطة قلبتة

______________________________

أنا المنحوس وأللى ضيع وأتساهل

أصبحت منبوذ دة غلطى وأستاهل

ليلى شبه نهارى وتايه فى أوهام

ودة أللى حاسس بية خلاص خلص الكلام

نفسى أحسهاااا أكتر من كدة

على رأى أحمد مكى

مش ممكن أرضى بغيرك أنتى بيت
حاجة غريبة

لما تكون هى الأمان ومتحسهوش ...

لما تكون هى الأمل وولدها فى التوهان ....

بدل مايسندوها ويساعدوها ... يخدو أللى عندها ويصدموها

أخوتهم صغار مش فاهمين حاجة

وأللى بيفهم منهم بيدولة على دماغة ويقلولو أنت مش فاهم دة لمصلحتك ..

أزاى لمصلحتى واأناحاسس بالغدر فى عنيهم ..

أزاى من مصلحتك وهما دايسين على قلب أمك برجليهم ..

أمى وأمك بتحوينا وفى بيوتها الفقيرة تدارينا وهما أمتلكو القصور ...

أزاى لمصلحتى مش عايز دى مصلحة تغور ...

عايز أمى مصر أللى سمعت عنها ومعشتش فيها عايز الحق فى بلدى

والكرامة لأهل الكرامة تعود!!!

لا تقولى شاب أنتحر ولا فى شهيد على الحدود!!!

لا تقولى أسكت وعيش بدل مايبقالقش وجود!!!

لاتقولى أحنا السبب . ياشعب يامصدود!!!

لاتقولى كلمة حق نحقق بيها الوعود!!!

عايز أمى مصر أللى سمعت عنها زمان...

من أبوية وأجدادى أللى عرفوا يعنى أية أوطان...

أمانى ووعود لبلدى على الشط البعيد

الشمس تروح وتيجى وهيجى الجيل الجديد

هايجى فارد جناحة أللى أنكسر وأندهس

ومساه يقلب صباحة وحياته هاتنعكس....

أسود لون حياتى

أسود لون حياتى * أسود دة ضلى على الحيط

أسود يعنى مستقبلى * أسود يعنى حزنى

أسود قلب الحكومة * أسود يعنى النظام فى بلدى

أسود موصوف كيانة بالشأم ندارى أية

أسود صندوق حكاوى هانقول على أللى فية

أسمر يالون الجدع النيل كان بيروية

أسمر وحقة ضاع وبيدور علية

أسمر وشاف الذل فى بلد أصول تحمية

أسمر وسمارة عتم من أللى بيجرى لية

بان الكبر على شكلة والطريق لسة مسدود

بان الظلم على بلدة والحق مالهوش وجود

بان الجهل فى ولاده بفقر مالوش حدود

بان المستقبل أسود والحكومة بتقول وعود

رعب فى قلب البنية على أبوها الغلبان

يكون هو الضحية فين أحساس الأمان

رعب فى قلب المواطن من غدر الغربان

يكون الصم واصل للجنة حقوق الأنسان

أسود صندوق حكاوى نقول تانى أية

أسود موصوف كيانة بالشأم ندارى أية

التراب الناعم .........!

وكل ماتبقى منى شوية حطاااااام

الحياة كلها تسوى أية

أنا كنت النهاردة فى دفنة أبوا واحد صاحبى بس كان يوم. لووز . لووز . لووز .

نزلت التربة وكانت فيها نسمة غريبة عن النسمة الدنيوية

نسمة تسمى بنسمة التراب الناعم وتخيلت لو أنا هاعيش ميت على طول

وكانت النسمة دى الهواء أللى بستنشقة بدل الهواء الدنيوى..

وكنت من أهل التراب الناعم

أذاى هاقدر أعيش بين البشر وفى أى شكل مصاص دماء

ولا فى شكل شبح .... أيوة هبقى شبح

وقلب الشبح مابيندبح ... خلاص أنا هاعيش بين الناس كالشبح ..

مش هاخلى حد يحس بوجودى من عدمة .

هاكون أنسان هوائى وبلا معنى وغير مؤثر فى الغير وتأثيري هايكون لنفسى بس ...

أيوة أنا وبس

وهى دى العناصر أللى هامشى عليها

1-ممنوع الأحساس بالعاطفة . أيوة هاقتلها جوايا

2-مش هادون تانى . لأنى مدون فاااااااااشل .. جدا جدا

3-مش هافكر فى بلدى . أة كاكوميرا لبلدى

4-مش هاهتم برأى الغير .. بس هاقدر عارض الرأى

5-هاعيش أقرأ بس .. لأن دى الحاجة الوحيدة أللى بقدر أتحكم فيها
أللى بيعجبنى هاقرأه وأللى مش هايعجبنى برضة هاقرأه رخاااااامة.

**وكدة هابدأ أبقى رخم بجد وهابقى شبح بالنسبة لنفسى وأللى مش عاجبة

أسف فى اللفظ (كيلو سمك)

أنتخابات نزيهه..! ربنا يخلى أم سرور

أنتخابات نزيهه... ولا فتحية؟

حبيت أكتب . كتبت صوتى على ورقة

الورقة طارت ووقعت عندهم فى المرقة

والمرقة مرقة كوسة هاتفرق أية مش فارقة

لأ فرقت ياأبن بلدى غفلوا الشعب سرقة

والسرقة حرفة الحويط وهو دة كبيرهم

عاملهم ستارة لية ينكشفوا يجي غيرهم!!

يابلدى أنا مليت من أهمالى فيكى.

أمتة يبقالى صوت يمكن أقدر أعليكى.

أنا حر خايف أطير يقصقصو ريشى

الحكم لو بالصوت أنتى راح تعيشى

تعيشى أحنا نعيش بأدينا نحميكى.

نتحدى كل العالم ونتباها بيكى .

حلم جميل ونفسى يابلدنا نحققة.

الحكم يكون بصوتنا من غير مايسرقوا.

المسافات فى نظرى أية( يا دورى ياان __ نجا هوكى دورى يان)

موضوع شخصى

مسافات الحب!!. فى نظرى أنا أية ؟

لما أكون بحب ومش طايل؟ عادى ناس كتير كدة!

لما يكون أللى بحبة مش عارف شعورى نحيتة أية؟ عادى كتير برضة!

لما يكون أللى بحبة أنا نفسى مش عارف احبة أو أزاى أحبة ..!

دى وجه نظرى. هى دى المسافة مابينى وبين أللى بحبة..

أنا مش عارف يعنى أية روح واحدة وجسدين !!

ولا عارف يعنى أية أللى بيخلينى سعيد وأنا جنبة

بس أللى عارفة. انى بتكتف لما ببقى واقف معاه.

ولما يقرب منى ولو خطوة. قلبى بيفضل يشلت فى صدرى.

علشان شايف قدامة حتة منة!!

أسمها فى صفات كتيرة.. ونفسى بأسمها تنعم علية فى القرب منها.

ولكن الخوف .

الخوف دايما موجود جواية أنى أخسرها

أرجع وأقول انا راضى. كفاية باشوفها وبتكلم معاها .

أنا تايه فى حبها ... الحب الحقيقى بيجى فى حياة الأنسان مرة واحدة بس!

أيوة!.. بيه هانعيش من غيره هانعيش.

بس لية نعيش من غيرة بدل لاقيناه.. فى ناس بتعيش وبتموت

من غير ماتلاقية .!!

بينى وبينها مسافة نفسى تقربنا من بعض . مش تبعدنا عن بعض

لأن المسافات. يأما تقرب . يأما تبعد .

وأنا بصراحة مقدرش أبعد عايز أقرب

وياب هى تسمحلى أقرب..

_________________________________

وبحب أقول للى لقوو حبهم زى أللى (من مصر)

حافظ علية وراعى ربنا بجد فية

---------------------

أحداث مؤسفة

الحق مش بالشكل دة

عمل جناية الثأر منه خدوة *

أخدو حقهم من غير مايرحموة *

من غير تفكير قطعوه وقتلوة *

ربطوة بحبل فى عربية وفى الشوارع سحلوة *

عروو جثـتة وعلى عمود نور علقوة *

ودة حال المصرى فى البلد الشقيقة ياهوو *

ليهم حق ولو ليهم حق يخدوة *

فى قانون مش بالطريقة دى يعدموة *

ياحكومتنا أعملى حاجة بأمانة *

فينك ياعروبة دى العروبة ماتت جوانة *

حكومتنا تقول كلب وراح ماهو غلطان *

أشهدى عليهم يالجنة حقوق الأنسان *

لما المصرى جوة وبرة بلدة متهان *

جوة بلدة عايش جبان *

وبرة بلدة من غير أمان *

مصر خلاص بقت فى النسيان *

حاليا هى دى حالتى

' ;;;' ;;;' ;;;;' ;;;' ;;;;' ;;;;' ;;;;

';;;; ';;;; ';;;; ';;; ';;;; ';;;; ';;; ';;;;;

';;;;; ';;;; ';;;; ';;;;; ';;;; ';;;; ';;;;

';;;; ';;;; ';;;;

';;;; ';;;; ';;;;

';;;; ';;;; ';;;; ';;;; ';;;; ';;;; '///'///'///'///'///'///'

???"???"???"???"

???"???"???"???"

????????????????????????????????

هانفجر لو ماعبرتش عن أللى جواية

أنا مش عارفنى ! ولا عارفكو ! ولا عارف جيت الدنيا لية..!

أنا نفسى أعرف أنا عايش لية ؟!!

علشان أضر نفسى وأصحابى.. ولا علشان أكون أبن عاق لأبوية وأمى ..



ولا علشان أتعذب ولاعلشان أكون مرتكب جريمة قتل والمجنى علية هو ضميرى !!.



ولا جيت الدنيا لية السبب الصالح أو الصحيح فى حياتى أية ؟



نفسى أعرف أنا مين ولية وفى أى زمان أنا رايح ولا جاى ولا واقف محلك سر..!



ولا قسوتى أللى أتولدت جواية هاتفضل تفرم فى أللى يجيى قدامها زى( القطر )



لأى مدى هافضل أنسان سلبى؟ أمتى هاكون أنسان أيجابى ؟لى حق فى تأسيس المجتمع..!



أمتى هاكون أنسان يعتمد علية...



طيب لو حد من أللى قرأ الكلام دة عندة نصيحة ياريت ينصحنى..!!!!!!!!!



كأبن لية .أو أخ .أو أخت .أو أم .حد يدينى نصيحة تساعدنى فى النهوض من دوامة الغبى والقهر النفسى أللى أنا فية